image: ©Vinod Dave 2008
એક સન્નાટો તરે છે,ઓળખો છો ?
શખ્સ થઈ,ઇચ્છા ફરે છે ઓળખો છો ?
ઓળખીતાં અર્થના સંદર્ભ વચ્ચે
ફીણ જેવું વિસ્તરે છે,ઓળખો છો ?
વારતાનાં પાત્ર જેવું હાસ્ય વેરી
ગોઠવેલાં ડગ ભરે છે ઓળખો છો ?
લાલ-પીળાં પોત જેવું પાથરીને
સાવ ધોળું કરગરે છે,ઓળખો છો ?
ફૂલસામે જોઇનેં,નિઃશ્વાસ નાંખી
છુંદણાંને ખોતરે છે,ઓળખો છો ?
શું નહીંતર ઉપજે છે,શૂન્યથી !
તોય સરવાળાં કરે છે,ઓળખો છો ?
હોય છે મશગૂલ ચર્ચામાં મરણની
જિંદગીથી થરથરે છે,ઓળખો છો ?
ડો.મહેશ રાવલ
No comments:
Post a Comment